ރޯދަމަހަކީ ގިނަ ބަޔަކު އަޅުކަމަށް ޚާއްޞަކުރާ މަހެކެވެ. ގިނަ ވަގުތު އަޅުކަމުގައި ހޭދަކުރާ މަހެކެވެ. ނަމަވެސް ރޯދަމަހުގެ ބޭނުން ރަނގަޅު ގޮތުގައި ހިފަން ނޭނގޭ ބަޔަކު ވެސް އުޅެއެވެ. އެހެންކަމުން މި ލިޔުމުގައި ރޯދަ މަހުގެ ބޭނުން ރަނގަޅު ގޮތުގައި ހިފާނެ ގޮތުގެ އިރުޝާދު ތަކެއް ހިއްސާކޮށްލާނަމެވެ.
ރޯދަމަހުގެ ބޭނުން ރަނގަޅުގޮތުގައި ހިފުމަށްޓަކައި ރޯދަމަހު ގިނަގިނައިން ޤުރުއާންކިޔަވާށެވެ. މިގޮތުން ކޮންމެ ނަމާދަކަށް ފަހު ވަކި މިންވަރަކަށް ކިޔަވާށެވެ. އެއްފަހަރު ޚަތިމްކުރަން ބޭނުންނަމަ ކޮންމެ ނަމާދަކަށް ފަހު 4 ސަފުހާ ކިޔަވާށެވެ. ކުޅަދާނަވާނަމަ މިއަށް ވުރެ ވެސް ގިނައިން ކިޔަވާށެވެ. އޭރުން އެއް ފަހަރު ޚަތިމުކޮށްފައި އަނެއް ފަހަރު ފެށޭނެއެވެ. އެންމެ ދުވަހެއް ވެސް ވައްޓާނުލާ މިފަދައިން ކިޔަވާށެވެ. އޭރުން ޤުރުއާންކިޔެވުމުގެ ސަވާބު ލިބި ރޯދަމަހުގެ ސަވާބާއި ދަރުމަ ލިބޭނެއެވެ.
ސުންނަތް ނަމާދުތައް ގިނަކޮށް ރޯދަމަހުގެ ބޭނުން ހެޔޮގޮތުގައި ހިފާށެވެ. މިގޮތުން ތަރާވީސްނަމާދާއި ދަމުނަމާދުކުރަން އާދަކުރާށެވެ. އަދި ހުރިހާ ރޭއަޅުކަމަކަށް ފަހު އެންމެ ފަހުން ވިތުރިނަމާދު ކުރާށެވެ. މީގެއިތުރުން ޟުޙާނަމާދާއި، ރަވާތިބު ސުންނަތާއި، މަސްޖިދު ސުންނަތް ފަދަ ސުންނަތް ނަމާދުތައް ވެސް ކުރާށެވެ. މިފަދައިން ޢަމަލުކުރުމުން އެ ނަމާދުތަކުގެ ސަވާބު ލިބި ރޯދަމަސް ވެސް ކާމިޔާބު ގޮތެއްގައި ނިންމާލެވޭނެކަން ކަށަވަރެވެ.
ރޯދަމަހުގެ ސަވާބާއި ދަރުމަ ލިބިގަތުމަށް ޓަކައި ގިނަގިނައިން ޞަދަޤާތްކުރާށެވެ. ހާލުގައިޖެހިފައި ތިބި މީހުންނާއި، މިސްކީނުން އަދި ޔަތީމުންގެ މުހުތާދުތައް ފުއްދުމަށް ޓަކައި ކޮންމެވެސް މިންވަރެއްގެ ފައިސާ އެ މީހުންނަށް ދޭށެވެ. ނުވަތަ އެ މީހުންނަށް ކާއެއްޗެހި ދޭށެވެ. މީގެއިތުރުން ގޭދޮށަށް ރޯދަވީއްލަން އަންނަން މީހުންނަށް ދަޢުވަތު ދޭށެވެ. އޭރުން އެ ކަމުގެ ސަވާބުލިބި އެ މީހުންގެ ހެޔޮ ދުޢާ ވެސް ލިބޭނެކަން ޔަގީނެވެ.
ރޯދަމަހުގެ ދަރުމައާއި ސަވާބު ލިބިގަތުމަށް ޓަކައި ގިނަގިނައިން ޤުރުއާން ކިޔަވައި، ސުންނަން ނަމާދުކުރުން އިތުރުކޮށް އަދި ގިނަގިނައިން ޞަދަޤާތްކުރާށެވެ. އޭރުން އެ ޢަމަލުތަކުގެ ސަވާބުލިބި ރޯދަމަހުގެ ބޭނުން ހެޔޮ ގޮތުގައި ހިފޭނެކަމީ އެއްވެސް ޝައްކެއް އޮތް ކަމެއް ނޫނެވެ.
